Rəqsanə ilə keçmiş prodüseri canlı efirdə savaşdılar

Populyar müğənni Rəqsanə ilə keçmiş prodüseri Təranə Səmədova arasında qalmaqal davam edir.

Lux.Az-ın verdiyi məlumata görə, bu dəfə onlar yerli telekanallardan birinin canlı efirində qarşı-qarşıya gəliblər. Rəqsanə keçmiş prodüserini qızı Aysunun telefon nömrəsi və şəkillərini yaymaqda ittiham edib.

"Mən hər dəfə ekranlara qalmaqalla, şəxsi həyatımla çıxmaq istəmirəm. Amma bu, məndən asılı olmayan səbəblərdən baş verir. Açığı, artıq bu insanların adını çəkmək istəmirəm. Onlardan iyrənirəm. O, mənim haqqımda danışa bilər. Amma övladım haqda yox! Artıq hüquq-mühafizə orqanlarına da müraciət etmişəm. Lakin müraciətimə baxmırlar", - deyə Rəqsanə qeyd edib.

İfaçı fikrini belə davam etdirib: "Başa düşmürəm, bu insanların əlindən Azərbaycanı tərk etməliyəm? Öz evimdə də rahat yaşaya bilmirəm. İndi qızım Aysuya keçiblər. Odnoklassniki.ru saytında Aysun Namazova adıyla qeydiyyatdan keçib oraya qızımın fotolarını yerləşdiriblər. Uşağın cəmi 13 yaşı var. Bu şəkillər yalnız Təranədə var idi və bunları edən odur. Saytda müxtəlif kişilərə dostluq göndərir və onlara bizim nömrələrimizi paylayırlar. Artıq nömrə dəyişməkdən bezmişəm. Bunu Təranənin etdiyini dəqiq deyə bilmərəm. Ola bilsin ki, sadəcə, Aysunun şəkillərini kimlərəsə verib".