Azərbaycanın Müəllif Hüquqları Agentliyi Rusiyanın Slando.ru pulsuz elanlar saytında Azərbaycanın tar, kamança və saz milli musiqi alətlərinin erməni alətləri kimi təqdim olunmasına münasibət bildirib.

"Bu, növbəti erməni plagiatıdır. Onlar bizim digər folklor nümunələrimiz kimi, milli musiqi alətlərimizi də mənimsəməyə cəhd edirlər, - deyə agentlikdən Lux.Az saytına daxil olmuş məktubda bildirilir. - Azərbaycan qədim və zəngin folklor ənənələri olan ölkədir. Onların arasında ən vacib yerlərdən birini musiqi irsimiz tutur. Buraya həm qədim mahnı və nəğmələrimiz, həm lirik bayatılarımız, aşıq mahnılarımız və şübhəsiz ki, muğam daxildir. Azərbaycanın Qarabağ bölgəsində Azərbaycan aşıqları yaradıblar, erməni aşıqları isə onları yamsılayıblar. Mahnı və nəğmələr bizim tar, kamança, saz kimi alətlərimizin müşayiəti altında oxunub. Bütün bu dövrdə onlar "ermənilərin qanına işləyib"".

Agentlik bu faktı məşhur erməni xadimlərinin də etiraf etdiyini xatırladır və onlardan bəzilərini misal kimi göstərir: "Erməni aşıqlarını yalnız onların erməni ailələrində doğulduqları üçün erməni saymaq olar. Onlar daim Azərbaycan ustadlarının yaradıcılığına istinad ediblər, onların istifadə etdikləri alətlər isə türk alətləri – saz, santur, kaman və ya kamança, bağlama olub" (M.Nalbandyan, Əsərlərinin tam külliyyatı, Cild 1). Eyni müəllif "əksər mahnı və nəğmələrin türklərdən götürüldüyünü" də yazırdı: "Mən ermənilərin yaşadıqları çox yerlərdə olmuşam və həmişə hansısa erməni mahnısı dinləmək istəmişəm. Təəssüf ki, buna nail ola bilməmişəm".

"Mşaq" erməni qəzeti (Tbilisi, 3 sentyabr 1916-cı il) erməni xalqı arasında Azərbaycan musiqisinin uğurlarından yazırdı: "...onların (ermənilərin) qulaqları tar və kamança səsilə dolub. Bu üzdən də şərq mahnısı erməni xalqının canına, qanına hopub".

Məktubda bildirilir ki, ermənilərin Azərbaycan mədəni sərvətini mənimsəməsi ənənələrilə tanış olmaq istəyənlər professor Kamran İmanovun Azərbaycanın Müəllif Hüquqları Agentliyinin saytında (www.copag.gov.az) yerləşdirilmiş "Erməni "xalq nağılları"" kitabının elektron versiyasını oxuya bilərlər.