Yeni ildə yenə də göydən ölmüş quş cəsədləri düşməyə başlayıb. Lux.az-in dünya mətbuatına istinadən bverdiyi məlumata görə, ötən il olduğu kimi yenə göydən ölü qara quşlar düşüb. Bu hadisə ötən il olduğu kimi elə həmin tarixdə, yanvarın 2-də, həmin ərazidə, Amerikanın Arkanzas əyalətində baş verib. Belə ki, göydən 5 minə yaxın quş cəsədi düşüb.

Küçələrə, yollara, maşınların üstünə və evlərin damlarına düşən ölü quş cəsədləri insanları vahiməyə salıb. Göydən quş yağmasını bəziləri qiyamət ilinin ilk işarəsi kimi izah ediblər.

Qeyd edək ki, Mayya təqviminə görə, 2012-ci ildə dünyanın sonu olacağına inanılır.

Xatırladaq ki, ötən il də yanvarın 2-də Amerikanın Arkanzas əyalətindəki yaşayış qəsəbələrindən birinə ölü quş cəsədləri yağmışdı. Arkanzas “Ovçular və balıqçılar” cəmiyyətinin quşlar üzrə mütəxəssisi Karen Rou tapılan qara rəngli quşlarda fiziki travma olduğunu, bunun ildırım və ya dolu səbəbilə ola biləcəyi fərziyyəsini irəli sürmüşdü. Rou oxşar hadisələrin daha əvvəl başqa yerlərdə də baş verdiyini, quşların zəhərlənmədən ölmə ehtimalının olmadığını bildirmişdi. Başqa bir versiyada isə quşların yeni il fişəngləri səbəbilə uçuş marşrutlarını qarışdırdığı, bunun yaratdığı stressin ölümə yol açdığı deyilirdi.