"Ayın ətrafında çox qəribə dairəvi işıq peyda oldu. Çox qəribə idi", - oxucu bildirib.

Oxucumuzun yolladığı fotoya baxdıqda məlum olur ki, gerçəkdən də, axşam saatlarında səmada, Ayın ətrafında düzgün formalı dairə var.

İlkin versiya kimi bunu fotoçəkiliş zamanı yaranmış ekpozisiya defekti də saymaq olardı. Lakin hazırda fevral ayının olduğunu nəzərə alsaq, axşam və gecə saatlarında Ayın ətrafında belə dairənin peyda olması paradoks deyil.

Qış aylarında pəncərələrinin şüşələrindəki nazik buzdan baxdıqda işıq fənərinin ətrafında və ya yarımşəffaf parçadan baxdıqda evdəki elektrik lampasının ətrafında analoji dairəni görmək olar.

Mütəxəssislərin dediklərinə görə, Ayın ətraındakı dairə halodur ("halos" - yunanca "dairə, disk" deməkdir).

Halo səmanın yüksək qatlarında donaraq sıxlaşan və altıbucaqlı prizma formasını alan buz kristallarında Ay işığının sınmasından sonra yaranır. Bunun nəticəsində biz Ayın ətrafında 22 dərəcəli dairə görürük. Prizmatik buz kristallarından keçən işıq isə 46 dərəcə radiuslu dairə yaradır.

Ayın ətrafında kiçik halo formalaşır və işığın dispersiyası nəticəsində isti aylarda narıncı, qış aylarında isə ağımtıl rəngdə olur.