Bakıda rəsmi səfərdə olan Rusiya prezidenti Dmitri Medvedyevin rəsmi qarşılanma mərasimi olub. Rusiyanın dövlət başçısı və xanımını Svetlana Medvedevanı prezidenti İlham Əliyev və xanımı Mehriban Əliyeva qarşılayıb. Azərbaycanla Rusiyanın dövlət və hökumət nümayəndələri dövlət başçılarına təqdim olunub. Daha sonra prezidentlər-İlham Əliyev və Dmitri Medvedevin təkbətək görüşü keçirilib. Sonra görüş nümayəndə heyətlərinin iştirakı ilə geniş tərkibdə davam etdirildi. «Rusiya prezidentinin səfərinə çox böyük əhəmiyyət veririk» deyən prezident İlham Əliyev bu səfərin çox yaxşı nəticələri olacağına əminliyini bildirdi. Dövlət başçısı qeyd etdi ki, iki ölkə arasında münasibətlər təkcə ölkələrimiz üçün deyil, həm də regionda cərəyan edən proseslər üçün vacibdir. Prezident dedi ki, bu münasibətlər bizim üçün çox əhəmiyyətli, çox qiymətlidir. Bu, strateji tərəfdaşlıq münasibətləri, dostlar arasında münasibətlərdir. Əminəm ki, bu səfərin çox yaxşı nəticələri olacaq, imzalayacağımız sənədlər əlaqələrimizin daha da inkişafı üçün çox möhkəm baza yaradacaq. Rusiya prezidenti Dmitri Medvedev Azərbaycan tərəfinin danışıqların səmərəli keçməsi üçün hər cür şərait yaratdığını dedi. 

Rusiya prezidenti diqqətə çatdırdı ki, regional təhlükəsizliyin təmin edilməsi məsələləri ilə yanaşı, iki ölkə arasında əməkdaşlığın iqtisadi komponentinə daha artıq diqqət yetirmək olar. Ötən il böhranla əlaqədar iki ölkə arasında ticarət dövriyyəsi üçün o qədər də sadə il olmayıb-ticarət dövriyyəsi azalıb» deyən Dmitri Medvedev vurğulayıb ki, bu il müsbət meyillər var. Rusiyanın dövlət başçısı deyib ki, həmin meylləri möhkəmlətmək üçün tərəflər lazım olan hər işi görməli, yeni layihələrə başlamaq, yeni təmas nöqtələri tapmaq barədə fikirləşməlidir. Təkbətək görüş zamanı prezidentlər bəzi ideyaları müzakirə edib. Danışıqlardan sonra Azərbaycan-Rusiya sənədlərinin imzalanması mərasimi oldu. Dövlət Neft Şirkəti və Rusiyanın “Qazprom” Açıq Səhmdar Cəmiyyəti arasında təbii qazın alqı-satqısına dair daha əvvəl bağlanmış müqaviləyə əlavə olunan saziş imzalandı. Sazişə əsasən 2010-2011-ci illərdə “Qazprom”a satılan təbii qazın həcmi artırılacaq. İki ölkə arasında Samur transsərhəd çayının rasional istifadəsi və mühafizəsi haqqında saziş, eləcə də Rusiya və Azərbaycan dövlət sərhəddinin haradan keçəcəyini müəyyənləşməsi haqqında saziş imzalandı. Dövlət başçıları dövlət sərhəddi ilə bağlı müqaviləni imzaladı. Daha sonra ölkə başçılarının mətbuat konfransı keçirildi. Prezident İlham Əliyev bildirdi ki, qarşılıqlı səfərlər Azərbaycanla Rusiyanın bir-birilə əməkdaşlıqda maraqlı olduğunu göstərir. Rusiya prezidenti Dmitri Medvedyev isə dedi ki, bu gün Azərbaycan və Rusiya münasibətlərinin tarixində mühüm günlərdən biridir. İlk növbədə ona görə ki dövlət sərhədi ilə bağlı sazişə imza atıldı. Bununla da Azərbaycan ilk belə müqaviləni Rusiya ilə imzalamış oldu. Bu isə iki ölkə arasındakı münasibətlərin tərəfdaşlıq xarakteri daşıdığını bir daha nümayiş etdirir. Sonra Rusiya prezidenti Dmitri Medvedyev İctimai Televiziyanın sualını cavablandırdı. 

«Cənab prezident,  Azərbaycan ictimaiyyətini narahat edən məsələlərdən biri sizin Ermənistana səfərinizin nəticələri və orada imzalanan protokolla bağlıdır. Eləcə də Rusiyanın Gümrü hərbi bazası ilə bağlı imzalanan müqaviləyə əlavə edilən dəyişikliyi necə şərh edə bilərsiniz?»,- sualına cavabıda Dmitri Medvedyev deyib ki, bu barədə Azərbaycan prezidenti ilə müzakirələr aparıb: «Qafqazda sabitliyin qorunması Rusiya üçün çox önəmlidir. Çünki Rusiya da Qafqazın xəzəryanı ölkəsidir. Ona görə də biz Qafqazda sülhün bərqərar olmasında maraqlıyıq. Elə bu məqsədlə də bu protokol imzalandı. Burada heç bir gizli və ya digər niyyət yoxdu. Bu ancaq müqavilənin müddətinin uzadılmasıdır. Bu sənəddə təzə heç nə yoxdu.  Məqsədimiz Qafqazda sabitliyi qorumaqdı. Və gələcəkdə də biz bölgədə vəziyyəti yaxşılaşdımaq üçün müvafiq strukturlara tapşırıqlar verəcəyik.  

Prezidentlər Ermənistan-Azərbaycan Dağlıq Qarabağ münaqişəsinə də toxundular. Prezident İlham Əliyev bildirdi ki, uzun illərdir  Azərbaycanın torpaqları işğal altındadır: «Azərbaycan vətəndaşlarına qarşı etnik təmizləmə siyasəti aparılıb. Beynəlxalq qurumların qətnamələrinə baxmayaraq  torpaqlar hələ də işğal altındadır. Bu münaqişə beynəlxalq hüquq normaları və Azərbaycanın ərazi bütövlüyü çərçivəsində həll olunmalıdır. Mən Dmitri Medvedyevə Azərbaycan, Rusiya və Ermənistan prezidentləri arasında 3 tərəfli görüşün keçirilməsindəki dəstəyinə görə təşəkkür edirəm. Əminəm ki, Rusiya prezidentinin şəxsi iştirakı danışıqlarda səmərəli rol oynayır. Ümidvaram ki, Ermənistan tərəfi konstruktivlik nümayiş etdirəcək. Ümid edirəm ki, Rusiya bu istiqamətdə öz səylərini artıracaq». 

Medvedyev isə son zamanlar Rusiyanın iştirakı ilə Azərbaycan və Ermənistan arasındakı danışıqlar prosesinin xeyli intensivləşdiyini söyləyib: «Bu danışıqlar zamanı dəyərli müzakirələr aparılıb. Hazırda danışıqların davam etməsi də məhz həmin səylərin nəticəsidir. Rusiya həm ATƏT-in Minsk qrupunun həmsədri kimi, həm də Azərbaycana dost və qonşu ölkə kimi bu məsələyə öz töhfəsini verməyə hazırdır. Bu istiqamətdə ən çətin sualları müzakirə etməyə hazıram. Gələcəkdə də həmin danışıqlar həm nazirlər, həm də prezidentlər səviyyəsində davam etdiriləcək».  

Rusiya prezidenti Dmitri Medvedyev ötən ay Rusiyanı bürüyən meşə yanğınlarının söndürülməsində Azərbaycanın göstərdiyi köməyə görə prezident İlham Əliyevə təşəkkürünü də bildirdi. 

Xatırladaq ki, Dmitri Medvedev Azərbaycana səfəri çərçivəsində Bakı Dövlət Universitetində olub. Rusiya prezidentinə universitetin fəxri doktoru diplomu təqdim edilib. Daha sonra “Gülüstan” sarayında Prezident İlham Əliyev və xanımı Mehriban Əliyevanın adından Rusiya prezidenti Dmitri Medvedev və xanımı Svetlana Medvedevanın şərəfinə rəsmi ziyafət təşkil olunub. Hər iki ölkənin prezidenti mərasimdə çıxış edib. Azərbaycan prezidenti bildirib ki, Rusiya və Azərbaycan dövlət başçılarının qarşılıqlı səfərləri ikitərəfli münasibətlərin inkişafına təkan verir. Prezident İlham Əliyev qeyd edib ki, Azərbaycanla Rusiya siyasi, iqtisadi və digər sahələrdə səmərəli əməkdaşlıq qurub və bu səfər çərçivəsində imzalanacaq sənədlər münasibətlərin gələcək inkişafında mühüm rol oynayacaq. 2009-cu ildə dünya iqtisadi böhranının ağır nəticələrinə baxmayaraq, Rusiya ilə Azərbaycan arasında ticarət dövriyyəsinin artdığını və mühüm nəticələrin əldə olunduğunu deyən dövlət başçısı Ermənistan-Azərbaycan, Dağlıq Qarabağ münaqişəsinin nizamlanmasında Rusiyanın rolundan danışıb. Azərbaycanı Rusiyanın strateji tərəfdaşı adlandıran Dmitri Medvedev isə bildirib ki, səfər zamanı imzalanacaq sənədlər dostluq münasibətlərini daha da möhkəmləndirəcək, eyni zamanda, ikitərəfli normativ hüquqi bazanın güclənməsinə xidmət edəcək. 

Qeyd edək ki, ikitərəfli danışıqlar zamanı Azərbaycan və Rusiya prezidentləri enerji sahəsində ikitərəfli əməkdaşlığa həsr olunmuş sammit keçirilməsi haqqında da razılığa gəliblər. Rusiya prezidenti Dmitri Medvedevin sözlərinə görə, sammitdə qaz, neft və elektroenergetika sahəsində əməkdaşlıq məsələlərinə toxunula bilər. Prezident İlham Əliyev isə qeyd edib ki, rəsmi Bakı Azərbaycandan Rusiyaya nəql olunan təbii resursların həcminin artırılacağına ümid edir və energetika sahəsində Rusiya ilə əməkdaşlığın uzunmüddətli, strateji və qarşılıqlı maraqlara cavab verən olduğunu düşünür.